Faasilasilaga mo le Faalauiloa Aloaia o lenei Vaega Faaupufai o le Samoa Leipa

Secretariat
Jun 11
4 min read

Matou te faatulou atu i le Paia ma le Mamalu o Samoa, e le gafatia e so matou upu. O Paia faale-talalelei, paia faale-atunuu, paia faale-malo. Malo lava le soifua maua ma le lagi e mama.

E faasilasila atu ma le agaga faaaloalo o le a faalauiloa aloaia le matou vaega faaupufai o le Leipa

Samoa (Samoa Labour Party), i le aso 14 Iuni 2025. I le maota o le Ekalesia Katoliko i Tuutuuleloloto Hall.

O le a amata le sauniga lotu i le 10.00 i le taeao o lea lava aso. E valaau atu ma le agaga faaaloalo i le mamalu o le atunuu, tatou auai faatasi ma molimau lea faamoemoe.

O lenei vaega faaupufai o le Leipa, matou te faamuamua tagata faigaluega uma o Samoa, o le tausi o le filemu, ma le amiotonu i upufai o malo. E faataua foi le faatinoa o gaioiga e siisii ai luga le tamaoaiga o le atunuu.

O le fesili i manatu ma lagona o lenei vaitau, pe faapefea ona toe fealofani le atunuu? O le faatalaula atu lea o le vaega faaupufai o le Leipa, ina ia tatou opogi lenei manulauti o le "Samoa Fealofani". O le Samoa e fefaaaloaloa'i, se Samoa e fetausia'i, aua se manuia mo a tatou fanau ma aiga a taeao.

O le matou talitonuga mautu, ua tatou tuvae i se taunuuga e faataua ai soo se tagata faigaluega o Samoa: O oe le faiaoga, o le tausi soifua ma latou oloo faigaluega i le lagolagoina o le soifua maloloina, o oe le tagata faigaluega a le Malo, le faifaatoaga, fai pisinisi, tomai faapitoa ma matata eseese, le au talavou ma latou uma o loo tautua i soo se tafa o le atunuu - Aisea?

E le o lagona sou leo, leai se tali atu i upufai o malo, ma faaiuga fai o faigamalo e aafia ai le soifua tautua i lea aso ma lea aso - o le ala lea o le faatu o lenei vaega faaupufai, ina ia auauna mo outou o loo galulue ma faigaluega e tautua Samoa.

O le vaaiga taula'i - Tatou Fausiaina se Samoa manuia mo tagata uma

O le a faalauiloa i lea aso nisi o faiga faavae o le vaega o le Leipa, aua se manuia o Samoa, e pei o le:

Siitia totogi o le aufaigaluega ina ia mafai ona tali atu i le taugata o le soifuaga
Siitia totogi e talafeagai ma toe fa'aleleia tulaga o Galuega: Mo a tatou faiaoga, tausisoifua, tagata faigaluega i pisinisi tau turisi ma tagata faigaluega lautele o lo'o tauaveina le mamafa o galuega a le malo.
Faateleina avanoa faigaluega: e ala i le faaopopoina o le lagolago, faatasi ai ma avanoa mo aoaoga mo le tomai faapitoa e faatino ai galuega, mo i latou ua tuua aoaoga, aemaise ai le autalavou o loo tau saili ni galuega e tausi ai aiga.
O le avatua lea o le lagolago faapitoa mo tatou aufaipisinisi, faifaatoaga ma latou o loo ave oloa i atunuu mamao. E ala i polokalame e faalautele ai le gafataulimaina o le auina atu o tatou fua o faatoaga ma faaeleelega i maketi i atunuu i fafo. E pei o le toe faaleleia ma le toe fausia o galuega tetele i tua i nuu ma afioaga ina ia mafai ai ona faateleina tatou oloa gaosi mo le auina atu i fafo ma siisii ai le tamaoaiga o le atunuu.
O le toomaga lea mai le tau o le soifuaga ua iai nei. O se faiga faavae e tali atu ai le siisii o le tau o mea-taumafa, suauu/penisini, ma isi tulaga masani o loo faaoga mo aso uma.
O se faiga faavae a le Malo, e fesoasoani ai mo i latou o loo moomia si na fesoasoani ina ia mafai ai ona toe amatalia le atinaeina o aiga ma nuu. O avanoa e faasafua atu e manuia ai a tatou nuu ma Afioaga.
O se atunuu soifua maloloina ma le aoaoina lelei, e ala lea i le tapueina o le fanau laiti ia latou aoaoga faapitoa ma le siisii pea i luga o aoaoga i tausaga o le tuputupua'e o le tamaititi.
O ni Taitai e talitonu i agataualoa i faigamalo lelei, ma le lavatia o le tali atu e tetee faiga faa-alatua, ina ia talitonuina e tagatanuu o Samoa le tautua e manuia ai Samoa.